mehr erfahren:wjace zhonić dokumente:dokumenty lieder:spěwy links:pokazki blog serbska karta
Arnošt Muka/Jan Arnošt Holan Sobotu popołdnju ćehnjech wot Łutow do Hózneje; w korčmach rěčeše so němski; dźěći na wsy słyšach tež jenož němski. Wučer, rodźeny Serb, wuči němski. Dorosćeny lud rěči doma mjez sobu serbsce, z dźěćimi němsce. Hózna leži kaž Lipoj a Čikecy na Smolerjowej karće Hornjeje a Delnjeje Łužicy hižom zwonka serbskich mjezow, dyrbjała so pak po prawom hišće k serbšćinje ličić, hdyž tež z barbnym wuznamom, kaž to pola Andreea nałožene namakaš. By tohodla jara wužitna wěc za wědomosć była, hdy bychu so raz wučeni Serbjo zebrali, cyłe mjezy wobeju Łužicow wobpućowali a awtentisku kartu a statistiku zhotowili, přetož Smolerjowa karta ma, tak dobra kaž scyła je, tola zdźěla njedospołnosće, ta Bogusławskeho je njedospołna, Andreeowa je jara mała a njewěrnosćiwa. Při Hóznej wuhladach na polu stareho wowčerja; tuž sebi myslach: to je
něšto za tebje. K njemu so podawši woprašach so jeho serbsce, kak so jemu
wjedźe. Wón so wudźiwać njemóžeše, zo ja tež serbsce rěču, a běše jara wjesoły
a rěčliwy. Jako pak z mojej naležnosću před njeho stupich, womjelkny kaž
přećel, hdyž chceš sebi wot njeho pjenjezy požčić. Ja widźach, što jeho hori:
mysl, zo mam jeho k lěpšemu. Tehodla jemu jenu basničku wubach, kiž běch prjedy
w Košynje zhonił a stłóčich jemu 2. nsl. do ruhi. To jeho dušu a ert zaso
wotewri a wón rjekny: “Ně, ně, wó njejsćo mě pšawje hulicował, ta ma so
hinacej!” a powědaše mi moju basničku wo “chodojće a jeje knjechće” wjele
rjeńšo a dospołnišo. Nětk žórleše jena basnička po druhej. Ja so sydnych na
mokru mjezu, koleno za blido trjebawši, a napisach sebi tak derje kaž móžno
basnički po słowje. Běše to zajimawy wobraz. Stary wowčer w dołhim běłokožanym
pjelcu z pochilenej hłowu hłuboko myslo jako najwjetši filozof; k njeho nohomaj
spěšnje pisacy młodźenc přez brylu horje k njemu kukajo w chětro womazanej
pućowarskej drasće, kotrehož by prjedy za pastyrjoweho pomocnika hač za
Lipsčanskeho wědomosćow-sprócniweho dźeržał. Do koła wokoło črjóda dołhowołmjanych
wowcow, kiž z njewurjekliwej mudrosću na naju kawkachu, a z boka wowčerjowy Móras,
kiž spłóšiwje a njedowěrnje na mnje zhladowaše. Tak sebi napisach pjeć rjanych
basničkow wo ludkach a chodojtach na Košynec horje a kruch ludoweje pěsnje.
Runje běch w najzhorjenišim zapisowanju nječujo zymu a mokrotu, jako na bliskim
Bukowskim zastanišću telegraf klinkaše, zo ćah wot Komorowa zdobom přijědźe.
Tuž so zebrach a tak chwatnje, kaž běch prjedy basnički hromadźił, hromadźich
nětk mojej noze, tak zo w klacacych jambach runje hišće na zastanišćo doběžach,
jako ćah přijědźe. Wot Bukowa wotjědźech do Kamjenca a podach so nazajtra pěši
domoj do lubeho Wosyka.
|